Тошкент, Ўзбекистон (UzDaily.uz) — Ўзбекистон ёшлар терма жамоаси яна бир бор Чили тенгдошлари устидан устунликни намойиш этди ва кетма-кет иккинчи ўртоқлик учрашувида ғалаба қозонди.

Чили ҳудудида бўлиб ўтган учрашув 2:1 ҳисоби билан Осиё чемпионлари фойдасига якунланди. Уюшқоқ ўйин намойиш этган ўзбекистонлик футболчилар учрашувнинг 10-дақиқасида Садриддин Ҳасановнинг голи орқали ҳисобни очишди. 60-дақиқада эса Азизбек Абдумўминов иккинчи голни урди ва меҳмонлар афзаллигини икки баробар оширди.

Мезбонлар 78-дақиқада Максимо Эспиноланинг голи орқали ҳисобдаги фарқни қисқартиришга муваффақ бўлишди, аммо бу уларни мағлубиятдан сақлаб қолмади.

Эслатиб ўтамиз, икки жамоа ўртасидаги аввалги ўйинда ҳам Ўзбекистон терма жамоаси 1:0 ҳисобида ғалаба қозонган эди.