Ўзбекистон U17 Осиё чемпионатида иккинчи ўринни олди

Тошкент, Ўзбекистон (UzDaily.uz) — Вьетнамда ўтаётган спорт кураши бўйича U17 Осиё чемпионатида Ўзбекистоннинг грек-рим кураши терма жамоаси умумжамоа ҳисобида иккинчи ўринни эгаллади.

Навбатдаги мусобақа кунида Ўзбекистон вакиллари грек-рим ва аёллар кураши йўналишларида жами бешта медални қўлга киритди. Улар орасида битта олтин, битта кумуш ва учта бронза медали бор.

80 килограммгача бўлган вазн тоифасида Абдулазиз Холмирзаев Осиё чемпиони бўлди. 65 килограммгача бўлган вазн тоифасида Сардор Махмудов кумуш медални қўлга киритди.

Мусобақанинг бронза совриндорлари сифатида Кодиржон Фозилов (71 кг гача), Зайтуна Сапарова (40 кг гача) ва Сийсагул Сарсенбаева (61 кг гача) қайд этилди.

Мусобақа якунларига кўра, Ўзбекистоннинг грек-рим кураши бўйича терма жамоаси 161 очко тўплаб, жамоавий ҳисобда иккинчи ўринни эгаллади.