Фарғона ва Наманганда йирик миқдордаги дори воситалари мусодара қилинди

Тошкент, Ўзбекистон (UzDaily.uz) — Фарғона ва Наманган вилоятларида ҳуқуқни муҳофаза қилувчи органлар томонидан ноқонуний олиб кирилган ҳамда белгиланган талабларга зид равишда сақланган йирик партиядаги дори воситалари аниқланди.

Бу ҳақда Давлат хавфсизлик хизмати, божхона органлари ва бошқа тегишли идоралар ходимлари томонидан ўтказилган қўшма тезкор тадбирлар якунлари бўйича маълум қилинди.

Фарғона вилоятида Давлат хавфсизлик хизмати вилоят бошқармаси ходимлари божхона вакиллари билан ҳамкорликда дори воситаларининг ноқонуний муомаласига чек қўйди. Идоралар маълумотига кўра, 1987 йилда туғилган Фарғона шаҳри яшовчиси ўз уйида «Газель» автомашинасида келтирилган дори воситалари партиясини тушираётган вақтида қўлга олинган.

Текширув давомида умумий қиймати 778 миллион сўм бўлган 38 номдаги 45 960 дона дори воситаси аниқланган. Шунингдек, уй кўздан кечирилганда белгиланган талабларни бузган ҳолда сақланаётган, умумий қиймати 468 миллион сўм бўлган 25 номдаги яна 16 535 дона дори воситаси борлиги маълум бўлган.

Мазкур ҳолат юзасидан процессуал тартибда ҳужжатлар расмийлаштирилган.

Шунга ўхшаш тезкор тадбир Наманган вилоятида ҳам Давлат хавфсизлик хизмати, Иқтисодий жиноятларга қарши курашиш департаменти, божхона органлари ва Фармацевтика маҳсулотлари хавфсизлиги маркази ходимлари иштирокида ўтказилди.

Идоралар маълумотига кўра, 1995 ва 1993 йилларда туғилган икки нафар Наманган вилояти фуқароси Давлатобод туманидаги турар жой ва нотурар бинода кейинчалик сотиш мақсадида мамлакат ҳудудига ноқонуний олиб кирилган хорижий дори воситаларини сақлаб келган.

Учта манзилда ўтказилган кўздан кечириш ишлари давомида тахминий қиймати 1 миллиард сўмдан ортиқ бўлган 453 номдаги 32 528 қути дори воситалари мусодара қилинди.

Ҳозирда ҳар икки ҳолат бўйича олиб қўйилган дори воситалари юзасидан экспертизалар тайинланган бўлиб, тергов ҳаракатлари олиб борилмоқда.