TIV JCH–2026 uchun o‘zbekistonlik muxlislarga murojaat qildi

Toshkent, O‘zbekiston (UzDaily.uz) — O‘zbekiston Tashqi ishlar vazirligi 2026 yilgi futbol bo‘yicha jahon chempionati o‘yinlarini tomosha qilish va milliy terma jamoani qo‘llab-quvvatlash maqsadida AQSH va Meksikaga borishni rejalashtirayotgan fuqarolarga murojaat qildi.

Ommaviy axborot vositalari vakillarining savollariga javob berar ekan, TIV matbuot kotibi Omonulla Fayziyev jahon chempionati 2026 yil 11 iyundan 19 iyulgacha AQSH, Kanada va Meksikada bo‘lib o‘tishini eslatdi. U mustaqil O‘zbekiston tarixida ilk bor milliy terma jamoa jahon chempionatida ishtirok etishini taʼkidladi.

Vazirlik muxlislarga qabul qiluvchi davlatlarning kirish tartibi, viza va migratsiya talablari bilan oldindan tanishishni, zarur hujjatlarni o‘z vaqtida rasmiylashtirishni hamda ularning amal qilish muddatini tekshirishni tavsiya qildi.

Shuningdek, fuqarolarga pasport va boshqa muhim hujjatlarning asl nusxalarini doim yonida olib yurish, shu bilan birga ularning elektron va qog‘oz nusxalarini saqlash tavsiya etildi. Qabul qiluvchi mamlakatlar qonunchiligiga, huquqni muhofaza qiluvchi organlar talablariga va jamoat joylaridagi umumiy xulq-atvor qoidalariga qatʼiy rioya qilish zarurligiga alohida eʼtibor qaratildi.

TIV safar yo‘nalishlarini oldindan rejalashtirishni, rasmiy transport va axborot xizmatlaridan foydalanishni, odamlar gavjum joylarda shaxsiy xavfsizlik choralariga amal qilishni hamda ruxsat etilmagan ommaviy tadbirlarda ishtirok etishdan tiyilishni tavsiya qildi.

Favqulodda holatlar yuzaga kelganda, hujjatlar yo‘qolganda yoki boshqa muammolar paydo bo‘lganda fuqarolarga mahalliy tezkor xizmatlarga, shuningdek, O‘zbekistonning AQSHdagi diplomatik vakolatxonalariga murojaat qilish tavsiya etildi.

Tashqi siyosat idorasi o‘zbekistonlik muxlislarni xorijda mamlakatni munosib tarzda namoyon etishga, qabul qiluvchi davlatlarning qonunlari, jamoat tartibi, mahalliy anʼanalari va madaniyatiga hurmat bilan munosabatda bo‘lishga chaqirdi.

TIVda taʼkidlanishicha, jahon chempionati davomida O‘zbekiston va uning fuqarolariga bo‘lgan eʼtibor sezilarli darajada ortadi. Shu bois har bir vatandosh nafaqat muxlis, balki o‘z mamlakatining vakili sifatida qabul qilinadi.

Vazirlik zarurat tug‘ilganda fuqarolarga konsullik-huquqiy yordam ko‘rsatishga va ularning xorijdagi qonuniy manfaatlarini himoya qilish bo‘yicha ishlarni davom ettirishga tayyor ekanini tasdiqladi.