Saida Mirziyoyeva Londonda qator uchrashuvlar o‘tkazdi

Toshkent, O‘zbekiston (UzDaily.uz) — O‘zbekiston prezidenti Administratsiyasi rahbari Saida Mirziyoyeva Londonda investitsiyaviy hamkorlikni rivojlantirish, o‘zbek kompaniyalarini xalqaro kapital bozorlariga olib chiqish va mamlakatdagi moliyaviy islohotlarni kengaytirishga bag‘ishlangan qator uchrashuvlar o‘tkazdi.

Buyuk Britaniya bosh vazirining investitsiyalar bo‘yicha maslahatchisi Varun Chandra va Markaziy Osiyo hamda Ozarbayjon bo‘yicha savdo elchisi lord Jon Olderdays bilan bo‘lib o‘tgan uchrashuvda O‘zbekiston Milliy investitsiya jamg‘armasi — UzNIF‘ning jahon bozorlariga muvaffaqiyatli chiqishi muhokama qilindi. Uning so‘zlariga ko‘ra, Britaniya biznesining O‘zbekistonga bo‘lgan qiziqishi ortib bormoqda va investitsiyalar umumiy hajmi allaqachon 1 milliard dollardan oshgan.

Alohida ravishda Franklin Templeton bosh ijrochi direktori Jenni Jonson bilan ham uchrashuv bo‘lib o‘tdi. Tomonlar O‘zbekistonda kapital bozorini rivojlantirish, moliyaviy qonunchilikni takomillashtirish, xalqaro kliring tizimlari bilan integratsiya va Toshkent xalqaro moliya markazini tashkil etish masalalarini muhokama qildi. IPO tayyorgarlik jarayoni qisqa muddatlarda yakunlangani va joylashtirish yuqori natijalarni namoyon etgani taʼkidlandi.

London fond birjasi (LSE) bosh ijrochi direktori Juliya Enn Xoggett bilan o‘tkazilgan muzokaralarda UzNIF joylashtirilishi yakunlari, shuningdek barqaror moliyalashtirish, ESG standartlari, “yashil” obligatsiyalar chiqarish va o‘zbek kompaniyalarini global bozorlarga olib chiqish bo‘yicha hamkorlik istiqbollari muhokama qilindi. LSE bahosiga ko‘ra, UzNIF joylashtirilishi so‘nggi besh yil ichida maydondagi eng yirik IPO bo‘ldi.

Bundan tashqari, Saida Mirziyoyeva AQSH prezidentining Janubiy va Markaziy Osiyo bo‘yicha maxsus vakili Serdjio Gor bilan ham uchrashuv o‘tkazdi. Tomonlar ikki tomonlama hamkorlikni yana-da chuqurlashtirish bo‘yicha keyingi qadamlarni muhokama qildi.

Uchrashuvlar yakunlariga ko‘ra, xalqaro aloqalarning faollashuvi global investorlarning O‘zbekiston iqtisodiyotiga bo‘lgan qiziqishi ortib borayotganini va moliya bozori sohasidagi islohotlar davom etayotganini aks ettirayotgani taʼkidlandi.