Тошкентдаги ёнғин туфайли айрим ҳудудларда электр ўчди

Тошкент, Ўзбекистон (UzDaily.uz) — Тошкент шаҳрида 1 июнь куни 110 кВ кучланишли «Кўргазма» подстанциясида трансформатор ёнғин чиқиши оқибатида Олмазор ва Шайхонтоҳур туманларидаги айрим истеъмолчилар вақтинча электр таъминотисиз қолди.

Фавқулодда вазиятлар вазирлиги матбуот хизмати маълумотига кўра, Олмазор туманидаги Кичик ҳалқа автомобиль йўлида жойлашган подстанция ҳудудидаги ёнғин ҳақидаги хабар соат 18:57 да келиб тушган. Ёнғин-қутқарув экипажлари воқеа жойига соат 19:01 да етиб келган.

Ёнғин соат 19:12 да қуршаб олинган ва соат 19:17 да тўлиқ бартараф этилган. Ҳодиса оқибатида жабрланганлар йўқ.

«O‘zbekistan milliy elektr tarmoqlari» акциядорлик жамияти маълум қилишича, электр таъминотидаги узилишга «Кўргазма» подстанциясида юзага келган носозлик сабаб бўлган. Ҳодиса туфайли мазкур энергетика объектининг 6 кВ чиқиш қурилмаларига уланган тармоқларда кучланиш узилган.

Бахтсиз ҳодиса натижасида пойтахтнинг иккита туманида айрим истеъмолчилар электр энергияси билан узилишларга дуч келишди.

Айни пайтда мутахассислар носозлик сабабларини аниқлаш ва электр таъминотини тўлиқ тиклаш ишларини олиб бормоқда.