Саида Мирзиёева Лондонда қатор учрашувлар ўтказди

Тошкент, Ўзбекистон (UzDaily.uz) — Ўзбекистон президенти Администрацияси раҳбари Саида Мирзиёева Лондонда инвестициявий ҳамкорликни ривожлантириш, ўзбек компанияларини халқаро капитал бозорларига олиб чиқиш ва мамлакатдаги молиявий ислоҳотларни кенгайтиришга бағишланган қатор учрашувлар ўтказди.

Буюк Британия бош вазирининг инвестициялар бўйича маслаҳатчиси Варун Чандра ва Марказий Осиё ҳамда Озарбайжон бўйича савдо элчиси лорд Жон Олдердайс билан бўлиб ўтган учрашувда Ўзбекистон Миллий инвестиция жамғармаси — UzNIF’нинг жаҳон бозорларига муваффақиятли чиқиши муҳокама қилинди. Унинг сўзларига кўра, Британия бизнесининг Ўзбекистонга бўлган қизиқиши ортиб бормоқда ва инвестициялар умумий ҳажми аллақачон 1 миллиард доллардан ошган.

Алоҳида равишда Franklin Templeton бош ижрочи директори Женни Жонсон билан ҳам учрашув бўлиб ўтди. Томонлар Ўзбекистонда капитал бозорини ривожлантириш, молиявий қонунчиликни такомиллаштириш, халқаро клиринг тизимлари билан интеграция ва Тошкент халқаро молия марказини ташкил этиш масалаларини муҳокама қилди. IPO тайёргарлик жараёни қисқа муддатларда якунлангани ва жойлаштириш юқори натижаларни намоён этгани таъкидланди.

Лондон фонд биржаси (LSE) бош ижрочи директори Жулия Энн Хоггетт билан ўтказилган музокараларда UzNIF жойлаштирилиши якунлари, шунингдек барқарор молиялаштириш, ESG стандартлари, «яшил» облигациялар чиқариш ва ўзбек компанияларини глобал бозорларга олиб чиқиш бўйича ҳамкорлик истиқболлари муҳокама қилинди. LSE баҳосига кўра, UzNIF жойлаштирилиши сўнгги беш йил ичида майдондаги энг йирик IPO бўлди.

Бундан ташқари, Саида Мирзиёева АҚШ президентининг Жанубий ва Марказий Осиё бўйича махсус вакили Серджио Гор билан ҳам учрашув ўтказди. Томонлар икки томонлама ҳамкорликни янада чуқурлаштириш бўйича кейинги қадамларни муҳокама қилди.

Учрашувлар якунларига кўра, халқаро алоқаларнинг фаоллашуви глобал инвесторларнинг Ўзбекистон иқтисодиётига бўлган қизиқиши ортиб бораётганини ва молия бозори соҳасидаги ислоҳотлар давом этаётганини акс эттираётгани таъкидланди.