Тошкент, Ўзбекистон (UzDaily.uz) — Ўзбекистонда 515 минг ота-онага огоҳлантирувчи хат юборилганидан сўнг, мактабларда давомат даражаси 99% га етди. Бу ҳақда болалар ҳуқуқлари бўйича вакил Сурайё Рахмонова маълум қилди.

Миллий гвардия маълумотларига кўра, 2024 йил бошида ўртача мактабларда давомат 70% атрофида бўлган.

Бироқ, оммавий равишда ота-оналарга огоҳлантириш юборилганидан сўнг, йил охирига келиб бу кўрсаткич 95–99% гача ошди.

Айни пайтда республика бўйича 10 134 та мактаб фаолият юритмоқда, уларда 6,57 миллион нафар бола таҳсил олмоқда.

Бундан ташқари, 10 ёшдан 17 ёшгача бўлган 245 минг ўқувчи ўртасида ўтказилган сўровнома натижаларига кўра, 97% болалар ўз ҳуқуқларидан хабардор, 65% уларни яхши билади, 52% эса бу ҳақда мактабда маълумот олган.