Ўзбекистон олтин экспортини қайта тиклади

Тошкент, Ўзбекистон (UzDaily.uz) — Ўзбекистон етти ойлик танаффусдан сўнг номонетар олтин экспортни қайта тиклади.

Ўзбекистон Республикаси Миллий статистика қўмитаси маълумотларига кўра, 2026 йил апрель ойида қимматбаҳо металлнинг ташқи бозорларга етказиб бериш ҳажми 1 миллиард 503 миллион АҚШ долларини ташкил қилди.

Шу билан бирга, мазкур кўрсаткич 2025 йил апрель ойига нисбатан 27,4 фоизга паст бўлди. Ўшанда олтин экспорти ҳажми 1 миллиард 910 миллион долларга тенг бўлган.

2025 йил октябрь ойидан 2026 йил март ойигача олтин экспорти амалга оширилмаган. Шу тариқа, 2026 йил январь–апрель ойлари статистикасида қайд этилган барча экспорт ҳажми фақат апрель ойига тўғри келган.

Таққослаш учун, 2025 йил январь–апрель ойларида номонетар олтин экспорти 5 миллиард 481 миллион долларни ташкил этган ва олтин мамлакат умумий экспорти таркибида 45,7 фоиз улушга эга бўлган.

2026 йил январь–апрель ойлари якунларига кўра, ушбу кўрсаткич 15,1 фоизгача қисқарди. Бу, аввало, ҳисобот даврининг тўрт ойидан уч ойи давомида экспорт етказиб бериш ишлари амалга оширилмагани билан изоҳланмоқда.