Toshkent, O‘zbekiston (UzDaily.uz) — BAAning Metito Utilities kompaniyasi O‘zbekistonda barqaror suv resurslarini boshqarish bo‘yicha yangi loyihalarni amalga oshirmoqda. Bu haqda kompaniyaning bosh direktori Rami Gandur “Trend” nashriga bergan intervyusida maʼlum qildi.

SNG hududida suv sohasidagi birinchi davlat-xususiy sheriklik loyihasi — Namangandagi tozalash inshootlari qurilishi ushbu tashabbuslar uchun asos bo‘ldi. Metito bu tenderni 2021 yilda yutib olgan.

Loyiha doirasida kuniga 100 ming kub metr chiqindi suvlarni tozalash quvvatiga ega inshootning loyihalashtirilishi, moliyalashtirilishi, qurilishi, ekspluatatsiya qilinishi va xizmat ko‘rsatilishi, shuningdek, 7,5 km kanalizatsiya tarmoqlarini yotqizish ko‘zda tutilgan.

Loyihaning umumiy qiymati taxminan 90 million AQSH dollariga baholanmoqda, amalga oshirish muddati 25 yilni tashkil etadi, shundan dastlabki ikki yili (2021 yil maʼlumotlariga ko‘ra) qurilish uchun ajratilgan.

«Bu strategik ahamiyatga ega loyiha MDXda suv tozalash sektori uchun namuna bo‘lib, suv resurslarini barqaror boshqarishning eng yaxshi tajribalari va tamoyillarini shakllantirmoqda. Biz uni mintaqadagi innovatsiyalar va barqaror o‘sishni rag‘batlantiruvchi katalizator sifatida ko‘ramiz», — dedi Gandur.

Uning so‘zlariga ko‘ra, kompaniya hozirda moliyaviy bitimni yakunlash ustida hamkorlari bilan ish olib bormoqda, shundan so‘ng qurilish ishlari boshlanadi.

Bundan tashqari, Metito Namangan viloyatida nasos stansiyalarini modernizatsiya qilish loyihasini amalga oshirmoqda. Uning ko‘lami 2025 yil 13 yanvarda Abu-Dabida, prezident Shavkat Mirziyoyevning BAAga rasmiy tashrifi davomida imzolangan o‘zgartish kiritish shartnomasidan so‘ng kengaytirildi.

Kompaniya o‘zini barqaror rivojlanish tamoyillariga sodiq deb biladi va O‘zbekistonni suv infratuzilmasi sohasida innovatsion yechimlarni joriy etish uchun muhim yo‘nalish sifatida ko‘rib chiqmoqda.