Тошкент, Ўзбекистон (UzDaily.uz) — Yandex Uzbekistan дастурлаш ва математика бўйича интеллектуал танлов — Coding and Math Contest'ни ташкил этмоқда. Бу ўз билимларингизни синовдан ўтказиш, дунёдаги етакчи экспертлар томонидан тайёрланган топшириқларни бажариш ва қимматбаҳо совғаларни қўлга киритиш имконини беради.

Унда иштирок этиш учун Ўзбекистондаги олий ўқув юртлари талабалари ҳамда мамлакатда фаолият юритаётган IT-мутахассислари ариза топширишлари мумкин. Танловда муваффақият қозониш учун замонавий дастурлаш тиллари, алгоритмлар, статистика, эҳтимоллар назарияси, математик анализ ва чизиқли алгебра бўйича билимлар талаб этилади.

Танлов икки онлайн босқичда ўтказилади: иштирокчилар аввал дастурлаш бўйича, кейин эса математика бўйича топшириқларни бажаришади. Мазкур топшириқлар дунёнинг етакчи мутахассислари томонидан тайёрланган: дастурлаш бўйича Андрей Станкевич — ICPC жаҳон чемпионатининг энг номдор мураббийи, математика бўйича эса Алексей Толстиков — Yandex маълумотлар таҳлили мактаби директори ва Маҳмуд Содиков — Senior AI Engineer, MSc MIPT. Иккита босқич натижаларига кўра ғолиблар аниқланади ва New Uzbekistan University’да ўтказиладиган мукофотлаш маросимига таклиф этилади.

Танлов иштирокчиларга ўз маҳоратини синовдан ўтказиш имконини беради. Шунингдек, энг яхши иштирокчиларга пул мукофотлари, гаджетлар ва Yandex Plus учун промокодлар тақдим этилади. Жами мукофот фонди 65 млн сўм бўлиб, у 1-дан 8-ўрингача бўлган иштирокчилар ўртасида тақсимланади.

«Биз учун математика ва дастурлаш соҳасидаги истеъдодли студентлар ва ёш мутахассисларни ривожлантиришга ёрдам берадиган ташаббусларни қўллаб-қувватлаш муҳим. Yandex Uzbekistan Coding and Math Contest — бу фақат танлов эмас, балки иштирокчиларга ўз кучларини синовдан ўтказиш, қимматли тажриба олиш ва профессионал жамиятга аъзо бўлиш имкониятини беради. Бу лойиҳа IT-мутахассисларни тайёрлашга ҳисса қўшишига ишонамиз», — деб таъкидлади New Uzbekistan University'нинг ўқув ишлари бўйича биринчи проректори Dr. Баҳодир Аҳмедов.

Рўйхатдан ўтиш 18 апрелга қадар очиқ. Танлов инглиз тилида ўтказилади ва унда иштирок этиш бепул. Натижалар 27 апрель куни мукофотлаш маросимида эълон қилинади. Лойиҳа New Uzbekistan University, ML Community (INHA University) ва Yandex маълумотларни таҳлил қилиш мактаби билан ҳамкорликда амалга оширилмоқда.