Тошкент, Ўзбекистон (UzDaily.uz) — Хўжанд шаҳрида ўтказилган Ўзбекистон, Қирғизистон ва Тожикистон раҳбарлари уч томонлама саммити доирасида Туризм қўмитаси раиси Умид Шадиев “Наврўз - минтақадаги энг қадимий маданий-сайёҳлик мероси” мавзусидаги минтақавий сайёҳлик форум-мулоқотида иштирок этди. Форумда уч давлат туризм маъмуриятлари раҳбарлари ҳамда 100 га яқин сайёҳлик соҳаси ва оммавий ахборот воситалари вакиллари қатнашди.

Тадбирнинг асосий мақсади сайёҳлик соҳасидаги халқаро ҳамкорликни ривожлантириш, Наврўз байрамини умумий тарихнинг бир қисми сифатида оммалаштиришдир. Шунингдек, Наврўзни Марказий Осиёнинг энг муҳим сайёҳлик ва маданий брендларидан бири сифатида тарғиб қилиш орқали минтақада жозибадор ва ўзига хос сайёҳлик маҳсулотларини яратиш учун асос яратиш кўзда тутилган.

Ўзбекистон Марказий Осиёнинг ягона сайёҳлик ҳудудини янада ривожлантириш учун фаол ҳаракат қилмоқда. Бу доирада сайёҳлар минтақанинг бир нечта мамлакатларига осонлик билан ташриф буюриб, умумий тарих ва маданиятлар хилма-хиллиги билан танишишлари мумкин.

Форумда Ўзбекистоннинг минтақа сайёҳлик жозибадорлигини ошириш ва сайёҳлар оқимини кўпайтиришга қаратилган ташаббуслар муҳокама қилинди.

Жумладан, Ўзбекистон, Қирғизистон ва Тожикистоннинг ноёб табиий қўриқхоналари, тоғ тизимлари, кўллари, шунингдек, қадимий шаҳарлари ва бошқа диққатга сазовор жойларига ташриф буюришни ўз ичига олган “Фарғона водийсининг олтин сайёҳлик ҳалқаси”ни яратиш масаласи кўриб чиқилди.

Шунингдек, мамлакатларимизда ўтказиладиган байрам тадбирларини бирлаштирувчи “Наврўз - Марказий Осиё қалбида” деб номланган қўшма маданий-сайёҳлик йўналишини ташкил этиш масаласи ҳам муҳокама қилинди.

Бундай йўналишлар бирлик рамзи ва халқаро туризм бозори учун ноёб маҳсулотга айланиб, маданий меросни тарғиб қилишга ҳамда туризм соҳасидаги кичик ва ўрта бизнесни ривожлантиришга хизмат қилади.

Айтиш жоизки, Наврўз умумжаҳон маданий бойлик сифатида эътироф этилган бўлиб, 2009 йилда ЮНЕСКОнинг Инсоният номоддий маданий мероси рўйхатига киритилган.

Форум доирасида иштирокчи давлатлар сайёҳлик компанияларининг маршрутлари ва маҳсулотлари тақдимоти ҳамда B2B учрашувлари ўтказилди. Улар натижасида ҳамкорликни янада чуқурлаштириш ва сайёҳларни жалб этишга қаратилган битимлар имзоланди.