XII–XIII асрларга оид ноёб артефакт Лондондан Ўзбекистонга қайтарилмоқда

Тошкент, Ўзбекистон (UzDaily.uz) — XII–XIII асрларда яратилган гулбарг шаклидаги қўрғошин идиш Лондон галереясидан Ўзбекистонга қайтарилади, дея хабар берди мамлакат Ислом цивилизацияси маркази матбуот хизмати.

Марказ маълумотига кўра, ушбу артефакт Ғазнавийлар даврига тегишли бўлиб, ҳозирда Лондондаги Orpheus галереясида сақланмоқда. «Ушбу нодир топилма, ниҳоят, Лондондан юртимизга қайтмоқда», — дейилади матбуот хизматининг баёнотида.

Маълум қилинишича, ўша даврда бундай идишлар кенг қўлланиб, маросимий удумлар жараёнида ҳам, уй-жойларни безашда ҳам ишлатилган.

Сўнгги йилларда Ўзбекистон йўқотилган маданий бойликларни қайтариш ва уларнинг ноқонуний олиб чиқилишига қарши курашиш бўйича фаол ишлар олиб бормоқда.

Жорий йил июль ойида Ислом цивилизацияси маркази Sotheby’s ва Christie’s аукционларида ислом маданияти ва мамлакат тарихи билан боғлиқ бўлган, узоқ вақт хусусий коллекциялар ҳамда хорижий музейларда сақланиб келган қатор реликвияларни сотиб олгани ҳақида маълум қилган эди.