UzAuto Motors 3-пресслаш цехини очди — ишлаб чиқариш 25 фоизга ошади

Тошкент, Ўзбекистон (UzDaily.uz) — “UzAuto Motors” акциядорлик жамиятида корхонанинг ишлаб чиқариш қувватларини кенгайтиришга қаратилган 3-пресслаш цехининг тантанали очилиши бўлиб ўтди.

Компания маълумотларига кўра, янги цехнинг ишга туширилиши йилига қўшимча 140 минг дона автомобиль ишлаб чиқариш имконияти яратилади. Бу эса, ҳозирда йилига 410 минг дона автомобиль ишлаб чиқараётган корхона салоҳиятини 550 минг донага етказади. Натижада ишлаб чиқариш ҳажми аввалгига нисбатан 25,4%га ўсишини таъминлаб, мамлакатимиз автомобилсозлик саноатини ривожлантириш учун янги имкониятлар очади.

UzAuto Motors Ўзбекистон автомобиль бозорининг энг йирик иштирокчиларидан бири ҳисобланади. 2024 йилда компания 353 730 дона автомобиль сотган ҳолда бозорнинг 88 фоизини эгаллаган.

UzAuto Motors автомобиль ишлаб чиқарувчиси яқин келажакда саккизта янги автомобиль моделини тақдим этишни режалаштирмоқда. Бу ҳақда компания бош директори Янош Ковачс Тошкентда бўлиб ўтган Chevrolet Tahoe High Country тақдимотида маълум қилди.

Компания раҳбарининг сўзларига кўра, Tahoe High Country янги линиядаги биринчи моделга айланди. Аниқ моделлар ва сотувга чиқиш саналари ҳозирча ошкор этилмаган, бироқ янги маҳсулотлардан бири Chevrolet Captiva'нинг гибрид версияси бўлиши маълум.