Кўргазмалар 3-июнга қадар давом этади ҳамда бу йилги энг муҳим иқтисодий воқеалардан бири десак хато қилмаган бўламиз.

“Uzbekistan Agrotech Expo – 2016” ва “Uzbekistan Agromash Expo – 2016” халқаро ихтисослаштирилган кўргазмаларда Хитой, Жанубий Корея, Франция, Италия, Германия, Нидерландия, Бельгия, Австрия, Беларусь, Эрон, Россия ва дунёнинг бошқа давлатларидан бир юз етмишдан ортиқ компания иштирок этмоқда.

Кўргазмада «Doosan», «Daichi», «Deadong» (Жанубий Корея), «Case», «New Holland» (АҚШ), «Claas», «Lemken», «MAN» (Германия) ва дунёга машҳур бошқа етакчи компанияларнинг етмишдан ортиқ турдаги маҳсулоти намойиш этилмоқда.

Анъанавий тарзда ўтказилаётган ушбу кўргазмалар қишлоқ хўжалиги соҳасига замонавий минитехнологияларни кенг жалб қилиш, маҳсулотлар турини кўпайтириш ва хусусий тадбиркорликни ривожлантиришга хизмат қилмоқда. Хусусан, 2015 йилда ўтказилган мазкур кўргазма доирасида деҳқон ва фермер хўжаликлари, агрофирмалар, кичик корхоналар умумий қиймати 174,8 миллиард сўм бўлган қарийб 600 шартнома ва келишув имзоланган эди.

«Uzbekistan Agromash Expo – 2016» халқаро кўргазмасида ўнта мамлакатдан қишлоқ хўжалиги техника ва асбоб-ускуналари ишлаб чиқарадиган йигирмадан зиёд етакчи компания, «Агрегат заводи» ва «Чирчиққишлоқмаш» акциядорлик жамиятлари таркибига кирадиган корхоналар, тижорат банклари ва лизинг компаниялари иштирок этмоқда.

Ўтган йилгидан ҳам кўпроқ шартномалар имзоланиши кутилаётган бу йилги кўргазмаларда мамлакатимизнинг барча ҳудудидан фермерлар, кичик бизнес субъектлари таклиф этилган. Харидларни молиялаштириш бўйича тижорат банклари, лизинг ва суғурта компаниялари мутахассислари томонидан зарур маслаҳатлар берилмоқда. Шартномаларни расмийлаштириш, сотиб олинган ускуналарни манзилга етказиш бўйича зарур ёрдам кўрсатилади.

Халқаро кўргазмалар доирасида замонавий технологиялар тақдимоти, фермерлар учун семинар-учрашувлар ўтказилаётир.