Тошкент, Ўзбекистон (UzDaily.uz) — СМТИда Институт директори Элдор Ариповнинг БМТнинг мамлакатимиздаги асосий бўлинмалари, жумладан, ХМТ, ЮНEСКО, МБХТ, БМТГЖБ, БМТОИТС, БМТТД, ЮНИСEФ, ЖССТ, ФАО ва БМТАЖ вакиллари билан учрашуви бўлиб ўтди.

Мазмунли музокаралар чоғида томонлар ҳамкорликнинг устувор йўналишлари, шунингдек, уни янада кенгайтириш истиқболларини муҳокама қилдилар.

Учрашув бошида Элдор Арипов глобал ва минтақавий кун тартибидаги асосий масалалар бўйича шерикликни мустаҳкамлаш, биргаликдаги ечимларни ишлаб чиқиш учун БМТ билан мунтазам ҳамкорлик қилиш муҳимлигини таъкидлади.

Ўз навбатида, БМТнинг Ўзбекистондаги доимий координатори Сабине Маҳл мамлакатнинг глобал муаммоларни, жумладан, иқлим ўзгариши ва гендер тенглигини илгари суришга қўшаётган ҳиссасини юқори баҳолади. БМТ фаолиятини ҳар томонлама қўллаб-қувватлаётгани учун Ўзбекистон раҳбариятига самимий миннатдорлик билдирди. Унинг сўзларига кўра, бундай ҳамкорлик асосий устувор йўналишларни илгари суриш ва Барқарор ривожланиш мақсадларига (БРМ) эришиш учун муҳим аҳамиятга эга.

Учрашув иштирокчилари Ўзбекистон ва БМТ тузилмалари ўртасидаги ҳамкорликнинг юқори суръатини мамнуният билан қайд этдилар. Бугунги кунда кенг кўламли устувор йўналишларни қамраб олган 166 та қўшма дастур ва лойиҳалар амалга оширилаётгани таъкидланди. Бундан ташқари, Ўзбекистон ташаббуси билан БМТ Бош Ассамблеяси томонидан 13 та махсус резолюция қабул қилингани мамлакатимизнинг халқаро майдондаги нуфузи тобора ортиб бораётганини тасдиқлайди.

Бундан ташқари, томонлар БМТ Бош Ассамблеясининг 80-сессиясига тайёргарлик кўриш доирасида ҳамкорликнинг асосий йўналишларини атрофлича муҳокама қилдилар. Иқлим ўзгариши билан боғлиқ муаммоларга қарши курашиш масалаларига алоҳида эътибор қаратилди. Иштирокчилар Ўзбекистоннинг экологик хавфсизлик соҳасидаги фаол позициясини, хусусан, ерларнинг деградациясига қарши курашиш ва яшил технологияларни ривожлантириш каби устувор йўналишлардаги саъй-ҳаракатларини юқори баҳоладилар. Ушбу ташаббуслар нафақат мамлакатнинг барқарор ривожланишига, балки минтақавий даражада ягона иқлим кун тартибини шакллантиришга ҳам салмоқли ҳисса қўшмоқда.

Экологик муаммолар доирасида озиқ-овқат хавфсизлигини таъминлаш чоралари ҳам муҳокама этилди. Ўзбекистон қишлоқ хўжалиги соҳасига инновацион ёндашувларни жорий этаётгани ва сув таъминоти тизимларини замонавийлаштираётгани алоҳида таъкидланди. Бу чора-тадбирлар иқлим ўзгариши ва аҳоли сонининг ўсиши шароитида янада долзарб аҳамият касб этмоқда.

Муҳокамалар давомида демографик дивидендга сармоя киритиш масаласи кўтарилди. Ушбу йўналишда иш ўринлари яратиш, таълим тизимини замонавийлаштириш ва ёшларнинг ўз салоҳиятини рўёбга чиқариши учун имкониятларни кенгайтириш бўйича кенг кўламли ишлар олиб борилаётгани таъкидланди. Ўзбекистон ҳамон ёш аҳолига эга мамлакат бўлиб қолмоқда: фуқароларнинг 55 фоизи 30 ёшга етмаган. Башоратларга кўра, меҳнатга лаёқатли аҳоли (15 ёшдан 64 ёшгача бўлганлар) сони 2023 йилдаги 23,6 миллион кишидан 2050 йилга келиб 33 миллиондан ошиши кутилмоқда.

Инсон ҳуқуқлари, жумладан, хотин-қизлар ҳуқуқларини кенгайтириш, уларнинг ижтимоий-сиёсий ва иқтисодий ҳаётдаги ролини кучайтириш борасидаги саъй-ҳаракатлар юксак баҳоланди. "Ўзбекистон - 2030" стратегияси доирасида хотин-қизларнинг сиёсий, ижтимоий ва иқтисодий соҳалардаги фаоллигини оширишга қаратилган кенг кўламли чора-тадбирлар амалга оширилмоқда. Натижада сўнгги беш йилда Ўзбекистонда ишбилармон аёллар сони икки баравар кўпайиб, иқтисодиёт ва саноатнинг турли соҳаларида уларнинг улуши қарийб 50 фоизни ташкил этмоқда.

Миграция масалалари алоҳида муҳокама қилинди. Фуқароларнинг ҳуқуқ ва манфаатларини ҳимоя қилишга қаратилган хавфсиз ва тартибли миграция сиёсатини юритиш муҳимлиги таъкидланди. Шу нуқтаи назардан, Ўзбекистон меҳнат мигрантларини фаол қўллаб-қувватлаётгани, ижтимоий ҳимоя механизмларини такомиллаштираётгани ва хорижда ишга жойлашишни қонунийлаштиришга кўмаклашаётгани таъкидланди.

Меҳмонлар Тошкентнинг минтақавий хавфсизликни таъминлашдаги роли ортиб бораётганини эътироф этдилар. Мамлакат ташқи сиёсатининг Афғонистон йўналишига алоҳида эътибор қаратилди. Қўшни мамлакатнинг минтақавий интеграция жараёнларига изчил қўшилиши улкан аҳамиятга эга экани қайд этилди.

Соғлиқни сақлаш соҳаси ҳам эътибордан четда қолмади. Ўзбекистонда тиббий ёрдам сифати ва оммабоплигини оширишга қаратилган изчил ислоҳотлар амалга оширилаётгани эътироф этилди. ЖССТ билан фаол ҳамкорлик халқаро стандартларни жорий этиш ва бирламчи тиббий-санитария ёрдами қамровини кенгайтиришга хизмат қилмоқда.

Учрашув якунида томонлар очиқ ва барқарор шерикликка бўлган интилишларини таъкидладилар. Биргаликдаги саъй-ҳаракатларни янада самарали мувофиқлаштириш ва Ўзбекистон билан БМТ ўртасидаги ҳамкорликнинг устувор йўналишларини илгари суриш имконини берадиган бундай учрашувларни мунтазам равишда давом эттиришга тайёр эканликларини билдирдилар.