Тошкент, Ўзбекистон (UzDaily.uz) — Россия ва Ўзбекистон ўртасида товар-транспорт ҳужжатлари бўйича трансчегаравий электрон ҳужжат айланмаси (ЭҲА) пилот лойиҳаси муваффақиятли якунланди, деб хабар қилди Санкт-Петербургдаги «Газинформсервис» масъулияти чекланган жамияти матбуот хизмати.

Лойиҳа операторлари сифатида Россиянинг «Тензор» компанияси ва Ўзбекистон Давлат солиқ қўмитаси ҳузуридаги «Янги технологиялар» илмий-ахборот маркази иштирок этди. Чет эл электрон имзоларини текшириш жараёнини «Газинформсервис» ва Unicon.uz илмий-техника ва маркетинг тадқиқотлари маркази таъминлади.

Лойиҳанинг асосий ютуғи икки мамлакат хўжалик субъектлари ўртасида товар-транспорт электрон ҳужжатлари алмашинувида электрон имзоларни ўзаро тан олиш учун ташкилий, ҳуқуқий ва технологик база яратилиши бўлди. Бу ташқи иқтисодий фаолият иштирокчиларига ҳуқуқий аҳамиятга эга ҳужжатлар билан электрон тарзда алмашиш имконини беради.

«Бу барча логистика ва молиявий жараёнларни кескин тезлаштиради: юкларни жўнатиш, битимларни якунлаш ва ҚҚСни қайтариш жараёни анча тез амалга ошади», — деди «Тензор» компаниясининг ЭҲА йўналиши раҳбари Елена Загребова.

«Газинформсервис» тасдиқловчи маркази бошлиғи Сергей Кирюшкин таъкидлашича, электрон ҳужжатлардан нафақат бизнес тузилмалар, балки мамлакатлар солиқ органлари ҳам фойдаланади. Унинг сўзларига кўра, трансчегаравий ЭҲАнинг қоғоз ҳужжат айланмасига нисбатан асосий афзалликлари — тезкорлик ва самарадорликдир: икки томонлама ҳужжатни электрон кўринишда имзолаш учун бор-йўғи бир неча дақиқа кифоя қилади.