Тошкент, Ўзбекистон (UzDaily.uz) — «Манчестер Сити» мухлислари «Ньюкасл» устидан қозонилган ғалабадан сўнг ўзбек ҳимоячиси Абдуқодир Хусановнинг ўйинидан мамнунлик билдирмоқда.

Эрлинг Холанд ва Омар Мармуш бошчилигидаги ҳужум чизиғи рақиб ҳимоясини парчалаб ташлаган бир пайтда, ҳимоячилар ўз вазифасини ишончли бажарди.

Ўйинда асосий фигуралардан бири бўлган Хусанов бутун ўйин давомида майдонда қолиб, ажойиб статистикани намойиш этди: 94% аниқ узатмалар, финал учдан бир қисмига 3 та узатма, 100% ютиб олинган курашлар, 8 та ҳимоявий ҳаракат ва дриблингда бирорта ҳам ютқазилган вазият йўқ.

«Челси» ва «Лейтон Ориент»га қарши учрашувлардаги асабийликдан фарқли равишда, бу гал ўзбек ҳимоячиси анча ишончли кўринди. Ҳужумчиларга бўлган эътиборга қарамай, айнан Хусанов мухлислар томонидан энг кўп мақтовга сазовор бўлди.

«Бизда ҳимояда икки генерал бор. Хусанов ва Стоунз – бу ақлбовар қилмас даража!» – деб ёзади бир мухлис ижтимоий тармоқда.

Яна бири уни клубнинг афсонавий капитани билан таққослади: «Хусанов бизнинг янги Винсент Компани бўлади.»

«Дебют ўйинида у анча ҳаяжонланган эди, аммо бугун у анча ишончли кўринди», – деб ёзади яна бир бошқа мухлис.

Мақтовлар тўхтамади: «Курашларда кучли, бирга-бир вазиятларда хотиржам, Рикони аъло даражада суғурта қилади ва тўп билан ишлашда мукаммал.»

«Хусанов – менинг идеал ҳимоячим: қатъий, тезкор, дабдабасиз, ўз вазифаси ва имкониятларини аниқ тушунади», – деб таъкидлади яна бир ишқибоз.

Гвардиола ҳимоячиларга катта маблағ сарфлаши билан машҳур, аммо Хусановнинг Александр Исак ва шерикларига қарши ўйинини ҳисобга олсак, испаниялик мураббийга янги ҳимоячи излашнинг ҳожати бўлмаслиги мумкин.