Тошкент, Ўзбекистон (UzDaily.uz) — Хитой Халқ Республикасида “Ўзбекистон–Хитой" савдо-иқтисодий ва инвестиция форуми” бўлиб ўтди. Унда Ўзбекистон Республикаси Бош вазири ўринбосари Жамшид Ходжаев бошчилигидаги делегация вакиллари иштирок этди.

Сўнгги йилларда Ўзбекистон–Хитой муносабатлари янги босқичга кўтарилиб, кўплаб соҳаларда ўзаро тенг манфаатлар асосида изчил ривожланмоқда. Айниқса, қишлоқ хўжалиги йўналишида — пахтачиликда Хитой агротехнологияларини жорий этиш, уруғчиликни ривожлантириш, илм-фан ва инновациялар соҳасида тажриба алмашиш каби йўналишларда ҳамкорлик ижобий натижалар бермоқда.

Форум доирасида имзоланган ҳужжатлар эса икки томонлама ҳамкорликнинг янги босқичини белгилаб берувчи муҳим қадам бўлди.

Хусусан, Ўзбекистон делегацияси таркибидаги Қишлоқ хўжалиги вазири ўринбосари Алишер Шукуров ва Хитойнинг “Чина Броад Футуре Тобассо Интернатионал Импорт анд Эхпорт Традинг Co. Лтд” компанияси бош ижрочи директори Фу Бо мамлакатимизда қўшма корхона ва агросаноат паркини ташкил этиш бўйича Ҳамкорлик битимини имзолашди.

Шунингдек, Алишер Шукуров ва Хитойнинг “Ҳенан Био-Индустрй Group Co., Лтд” компанияси бош ижрочи директори Қин Тиан Санг ўртасида “Хитой–Ўзбекистон биотехнология ва қишлоқ хўжалиги технологиялари саноат парки ташкил этиш” лойиҳасини амалга ошириш бўйича Ҳамкорлик меморандуми имзоланди.

Мазкур лойиҳалар янги иш ўринларини яратиш, аграр соҳага замонавий технологиялар ва инновацион ёндашувларни кенг жорий этиш имконини беради.

Форум якунида томонлар амалга ошириладиган қўшма лойиҳаларнинг истиқболли бўлишига умид билдириб, ҳамкорликнинг ўзаро манфаатли жиҳатларини муҳокама қилдилар ва ҳужжатлар алмашдилар.