Тошкент, Ўзбекистон (UzDaily.uz) — Ўзбекистон элчихонаси Россия Федерацияси ҳудудида қонуний асосларсиз бўлиб турган республика фуқароларини юзага келиши мумкин бўлган салбий оқибатларга йўл қўймаслик учун зудлик билан уларнинг ҳуқуқий ҳолатини тартибга солиш чораларини кўришни қатъий талаб қилади.

2024 йил 30 декабрдаги Россия Федерацияси Президентининг 1126-сонли фармонига мувофиқ, 2025 йил 5 февралдан бошлаб Россия Ички ишлар вазирлиги томонидан назоратдаги шахслар реестри юритила бошлади. Ушбу реестрга миграция қонунчилигини бузган чет эл фуқаролари киритилади.

Фармонга кўра, ушбу реестрдаги шахслар 2025 йил 1 январдан 30 апрелгача Россия ҳудудини тарк этиш ёки Россия ИИВ ҳудудий бўлимларига, “ПВС” давлат унитар корхонаси филиалига ёки Москва шаҳридаги «Сахарово» кўп функцияли миграция марказига мурожаат қилиб, ўз ҳуқуқий мақомларини расмийлаштиришлари зарур.

Россия ИИВ маълумотларига кўра, фармонда белгиланган “амнистия” даврида ушбу шахсларга нисбатан қуйидаги чоралар қўлланилмайди:

– мамлакатдан чиқариш;
– мажбурий равишда махсус муассасаларга жойлаштириш;
– келгусида Россияга киришни чеклаш.

Назоратдаги шахслар учун тақиқлар:

– кўчмас мулк ва транспорт воситаларини сотиб олиш ва рўйхатдан ўтказиш;
– никоҳ тузиш;
– юридик шахслар ташкил этиш ва якка тартибдаги тадбиркор сифатида рўйхатдан ўтиш;
– банк ҳисоб рақамларини очиш ва молиявий операцияларни амалга ошириш;
– транспорт воситаларини бошқариш.

Бундан ташқари, Россияда ноқонуний бўлган вояга этмаган хорижий фуқаролар таълим муассасаларига, жумладан, мактаб ва болалар боғчаларига қабул қилинмайди.

“Элчихона Россия Федерацияси ҳудудида ноқонуний бўлган Ўзбекистон Республикаси фуқароларини салбий оқибатларга йўл қўймаслик учун зудлик билан уларнинг ҳуқуқий ҳолатини тартибга солиш чораларини кўришни қатъий сўрайди”,— дейилади дипломатик ваколатхона баёнотида.

Ўз мақомингизни Россия ИИВ расмий сайти орқали текширишингиз мумкин.