Тошкент, Ўзбекистон (UzDaily.uz) — Ўзбекистон Диний ишлар қўмитаси Умра зиёратини ташкил этишда қўшимча қонунбузарлик ҳолатларини аниқлади, дея хабар бермоқда қўмита матбуот хизмати.

Хусусан, Марғилондаги Xurmo Travel Umra компанияси Saxiy Travel бренди остида Умра зиёрати хизматларини кўрсатган, аммо зиёратни ташкил этиш учун лицензияга эга бўлмаган.

Шунингдек, Тошкентнинг Чилонзор туманида жойлашган жисмоний шахслар Sokin Travel компанияси номидан Умра зиёратини ташкил этиш билан шуғулланган, лекин юридик шахс сифатида рўйхатдан ўтмаган. Ана шундай ҳолат Сурхондарё вилояти Денов шаҳридаги Anor Tour операторида ҳам аниқланган.

Ушбу қонунбузарликларга жавобан, қўмита Xurmo Travel Umra компаниясига 200 БҲМ (75 миллион сўм) миқдорида жарима солди. Anor Tour ва Sokin Travel компаниялари бўйича материаллар ҳуқуқ-тартибот идораларига топширилди.

2024 йил ноябрь ойида ҳукумат Умра зиёратини ташкил этиш ҳуқуқига эга бўлган компаниялар рўйхатини тасдиқлаган эди. Ушбу рўйхатга Тошкентдан олти, Наманганда уч, Андижон, Марғилон ва Урганчдан биртадан фирма киритилган.

Янги талабларга кўра, зиёрат ташкилотчилари «Зиёрат» жамғармасига 1 миллион АҚШ доллари миқдорида маблағ киритиши ва Саудия Арабистонидаги ҳамкор ташкилот билан шартнома тузиши шарт. Паломларнинг тиббий ёрдами, озиқ-овқати, меҳмонхонада жойлаштирилиши ва бошқа масалалар учун жавобгарлик ташкилотчилар зиммасига юкланади.