Тошкент, Ўзбекистон (UzDaily.uz) — «Ўзбекистон темир йўллари» компанияси мамлакат ичидаги темир йўл юк ташиш хизматлари бўйича тарифларни оширмоқда.

Янги шартларга кўра, 2025 йил 15 январдан бошлаб умумий фойдаланувдаги йўллар (инфратузилма) ва локомотивлардан фойдаланиш тарифлари учун коэффициентлар ўзгармоқда. Ушбу коэффициентлар 10−01 нархнома асосида белгилаб берилган.

Янги коэффициентлар:

«Тошгузар — Бойсун — Қумқўрғон» йўналиши учун — 0,814;
«Ангрен — Поп» йўналиши учун — 0,921;
Иккала йўналишни ҳам ўз ичига олган маршрутлар учун — 0,921;
Ушбу йўналишларни ўз ичига олмайдиган маршрутлар учун — 0,774.
Тарифларнинг илгари оширилиши 2023 йил октябрь ойида амалга оширилган эди. Шунингдек, шу йил ноябрь ойида компания ички юк ташиш учун инвентар вагонлар тақдим этиш тарифларини 30% га оширишини эълон қилган эди.

«Темир йўл транспорти тўғрисида»ги қонуннинг янги таҳририда юк ташиш соҳасида бозор механизмлари асосида нарх белгилаш тизими жорий этилиши кўзда тутилган. Унга кўра, ички ташишларга чегирмалар бекор қилинади. Шу билан бирга, бундай чегирмалар бериш имконияти Вазирлар Маҳкамасининг алоҳида қарори билан белгиланиши мумкин.