Тошкент, Ўзбекистон (UzDaily.uz) — Андижон вилоятининг Избоскан туман суди чет эл ҳудудидаги ҳарбий ҳаракатларда қатнашган Ўзбекистон фуқароси Х.Х. (1985 йил туғилган)га нисбатан жиноят ишини кўриб чиқди.

Жиноят иши материалларига кўра, Х.Х. 2019 йил июнь ойида меҳнат мигранти сифатида Россияга чиққан. 2023 йил октябрь ойида у Россия Федерацияси Мудофаа вазирлиги билан шартнома имзолаб, ҳарбий тайёргарлик курсларини ўтади.

2024 йил июль ва август ойларида у Украина ҳудудида — Луганск вилояти ҳамда Волчанск шаҳридаги ҳарбий ҳаракатларда иштирок этган ва жароҳат олган.

Россиянинг ҳарбий госпиталларида даволангандан сўнг, Х.Х. давлат чегарасини ноқонуний равишда кесиб ўтиб, Ўзбекистонга қайтган.

Суд мажлисида у ўз айбини тан олди, батафсил кўрсатма берди, пушаймон эканини билдирди ва Россия паспортини олганини, аммо Ўзбекистон фуқаролигидан воз кечмаганини тасдиқлади.

Суд Х.Х.ни Ўзбекистон Республикаси Жиноят кодексининг қуйидаги моддалари бўйича айбдор деб топди:

— 154-модда 1-қисм (бошқа давлатларнинг қуролли тузилмаларида иштирок этиш);
— 154-1-модда 1-қисм (чет давлатда ҳарбий хизмат ўташ);
— 223-модда 1-қисм (давлат чегарасини ноқонуний кесиб ўтиш).

Жиноятлар йиғиндисини ҳисобга олган ҳолда ва Жиноят кодексининг 59-моддасига асосан, суд Х.Х.га умумий режимдаги жазо колониясида 3 йил 1 ой муддатга озодликдан маҳрум этиш жазосини тайинлади.

Шунингдек, суд тергов давомида мусодара қилинган мобил телефонни йўқ қилиш ҳақида қарор чиқарди.