Тошкент, Ўзбекистон (UzDaily.uz) — 2025 йилдан бошлаб Ўзбекистонда мобил алоқа хизматларига акциз солиғи бекор қилинади.

Мазкур ўзгаришлар мамлакат қонунчилигига киритилди.

Бундан аввал мобил алоқага акциз солиғи ставкаси 10% ни ташкил этган эди.

Эслатиб ўтамиз, акциз солиғи 2019 йилда 15% миқдорида жорий этилган бўлиб, шу билан бирга абонент рақамидан фойдаланиш тўлови ойига 2000 сўмгача пасайтирилган эди.

2020 йилда ставка 20% га оширилди.

2021 йилда Ўзбекистон Президенти Шавкат Мирзиёев мобил алоқага акциз солиғи ставкаси 10% га туширилиши тўғрисида қарор қабул қилган ҳамда 2023 йилдан бошлаб солиқни тўлиқ бекор қилиш имконияти кўриб чиқилган эди. Бироқ бу қарор ҳозирга қадар амалга оширилмаган.