Тошкент, Ўзбекистон (UzDaily.uz) — Ўзбекистонда техник тартибга солиш соҳасидаги назорат инспекцияси хитойлик Leapmotor брендига тегишли енгил автомобилларни сертификатлаш учун аризалар қабул қилишни вақтинча тўхтатди.

Бундай қарорга 10 март куни "Ўзтест" давлат муассасаси лабораториясида Leapmotor C16 модели устида ўтказилган синов натижалари асос бўлди. Инспекция хулосасига кўра, ушбу автомашина БМТнинг халқаро хавфсизлик стандартларига жавоб бермайди. Хусусан, транспорт воситаси томонидан яратиладиган кенг полосали электромагнит бузғунчилик даражаси белгиланган меъёрдан 16 баробар юқори экани аниқланди.

28 март куни Euro Prof Test компанияси томонидан юборилган мактубда ҳам Leapmotor C16 модели кенг полосали электромагнит бузғунчилик даражаси бўйича талабларга жавоб бермаслиги кўрсатилган. Инспекция фикрига кўра, бу ҳолат автомобилнинг электрон тизими ишига салбий таъсир кўрсатиши, айрим ҳолларда эса унинг ишдан чиқишига сабаб бўлиши мумкин.

Аниқланган камчиликлар муносабати билан инспекция сертификатлаш органига Leapmotor брендининг барча моделларини сертификатлаш жараёнини тўхтатишни тавсия қилди.

Бундан ташқари, идора истеъмолчиларга автомобил танлашда халқаро стандартларга жавоб берадиган маҳсулотларга устуворлик бериш ва транспорт воситаларини фақат расмий дилерлардан харид қилишни тавсия этди.

Маълумот учун, Ўзбекистонда автомобилларнинг мувофиқлик баҳолаши 2017 йил 25 апрелда Вазирлар Маҳкамасининг №237-сонли қарори билан тасдиқланган ғилдиракли транспорт воситалари хавфсизлиги бўйича техник регламентга асосан амалга оширилади.

Сертификатлаш жараёнининг тўхтатилиши мазкур бренд автомобилларини мамлакатга олиб кириш имкониятини амалда чеклайди.