Тошкент, Ўзбекистон (UzDaily.uz) — 1 июлдан бошлаб Ўзбекистонда кўп қаватли уйлар атрофидаги ер қопламлари ва яшил ҳудудларда ўзбошимчалик билан бетон қоплаш, қурилиш ишлари олиб бориш ва турли иншоотлар ўрнатиш учун жавобгарлик кучайтирилади.

Мазкур чора-тадбирлар Президент Шавкат Мирзиёевнинг 30 январдаги фармони билан тасдиқланган «Ўзбекистон-2030» Стратегиясини амалга оширишга қаратилган Давлат дастури доирасида амалга оширилмоқда.

Қарор кенг жамоатчилик, халқаро ва маҳаллий экофаоллар, шунингдек, экология соҳасидаги илмий ҳамжамиятнинг таклифлари инобатга олиниб қабул қилинди. Бу қадам шаҳарлар ва аҳоли пунктларида ҳосилдор тупроқ қатламини муҳофаза қилиш ҳамда яшил ҳудудларни сақлашга қаратилган.

Шунингдек, кўп қаватли уйларни лойиҳалаш, қуриш ва фойдаланишга топширишда оқова, ёмғир сувлари ва техник сувлардан фойдаланган ҳолда суғориш тизимларини мажбурий ўрнатиш талаби жорий этилади.

2025 йилда маҳаллаларнинг экологик қиёфасини яхшилаш ва кўчаларни кўкаламзорлаштириш бўйича қатор тадбирлар режалаштирилган. Жумладан, пиёда ва велосипед йўлаклари бўйлаб дарахтлар ва ўсимликлар экиш орқали «Сойали сайр кўчалари» тармоғини яратиш режаси бор. Шунингдек, ёмғир ва оқова сувлардан самарали фойдаланиш, замонавий сув тежовчи технологияларни жорий этиш ишлари ҳам амалга оширилади.