Тошкент, Ўзбекистон (UzDaily.uz) — Хитойда бўлиб ўтган йирик савдо-иқтисодий ва инвестициявий форум Ўзбекистон–Хитой ўртасидаги ҳамкорликни янада мустаҳкамлаш йўлида муҳим қадамлардан бири бўлди. Ўзбекистон ҳукумати делегацияси таркибида «Ўзчармсаноат» уюшмаси ҳам фаол иштирок этди.

Форум доирасида «Ўзчармсаноат» уюшмаси раиси Акбар Султанов мамлакатимиз чарм-пойабзал саноатининг ишлаб чиқариш, инвестициявий ва экспорт салоҳиятига бағишланган махсус тақдимот қилди. Таъкидланганидек, сўнгги йилларда Ўзбекистонда чарм саноати тубдан модернизация қилиниб, халқаро талаб ва стандартларга жавоб берадиган ишлаб чиқариш қувватлари яратилди. Бугунги кунда республикада йилига миллионлаб жуфт пойабзал, юзлаб миллион квадрат десиметр чарм маҳсулотлари ишлаб чиқарилмоқда.

Саноатнинг экспорт салоҳияти ҳам изчил ошиб бормоқда – ўзбек чарм ва пойабзал маҳсулотлари нафақат қўшни давлатлар, балки Европа, Туркия, Хитой ва Жануби-Шарқий Осиё бозорларида ўз ўрнини топмоқда.

Тақдимотда, шунингдек, республикамиздаги кичик саноат зоналари (КСЗ) фаолияти ҳақида ҳам батафсил маълумот берилди. Султанов Хитой компанияларига бу ҳудудларда хорижий инвесторлар учун яратилган шарт-шароитларни таништирди. Жумладан:

• тўлиқ тайёр инфратузилма,
• солиқ ва божхона имтиёзлари,
• тезкор рўйхатга олиш ва ер майдони ажратиш имкониятлари,
• давлат томонидан қўллаб-қувватлаш дастурлари.

Бу имкониятлар Хитой компаниялари учун қўшма лойиҳаларни амалга ошириш ва ишлаб чиқаришни тезда йўлга қўйиш учун катта қулайлик яратади. Форум якунида томонлар Ўзбекистон чарм-пойабзал саноатида ўзаро ҳамкорликни кенгайтириш масалаларини муҳокама қилди. Хитой компаниялари мамлакатимиздаги ишлаб чиқариш кластерлари, хомашё базаси ва экспорт бозорларига чиқиш имкониятларини юқори баҳолади.

«Ўзчармсаноат» уюшмасининг иштироки натижасида чарм саноатида қўшма инвестицион лойиҳалар, замонавий технологияларни жорий этиш ва халқаро савдо алоқаларини кенгайтиришга қаратилган янги ташаббуслар муҳокама қилинди. Форум якунлари шуни кўрсатдики, Ўзбекистон чарм саноати халқаро ҳамкорлар учун ишончли ва истиқболли йўналиш бўлиб, Хитой билан шериклик алоқалари янада мустаҳкамланмоқда.