Тошкент, Ўзбекистон (UzDaily.uz) — Рақамли технологиялар вазири Шерзод Шерматов Яндекс компаниясининг Global бош ижрочи директори Даниил Шулеико билан учрашув ўтказди.

Учрашувда Вазирлик ва Яндекс ўртасидаги стратегик ҳамкорликнинг устувор йўналишлари, рақамли технологиялар соҳасида инновацияларни ривожлантириш ҳамда бу борадаги амалий лойиҳалар муҳокама қилинди.

Шунингдек, юртимизда рақамли технологияларни ривожлантириш учун Яндекс билан ҳамкорлик қилиш бўйича бир қатор истиқболли йўналишларга эътибор қаратилди.

Жумладан, сунъий интеллект йўналишида компания тажрибасидан фойдаланиш орқали лойиҳаларни амалга ошириш, уни давлат бошқарувида қўллаш имкониятлари, хизматларни автоматлаштириш ва маҳаллий IT-компаниялар билан ҳамкорликни йўлга қўйиш масалалари кўриб чиқилди.

Шунингдек, Яндекс технологиялари ва инновациялари асосида маълумотлар алмашиш жараёнларини оптималлаштириш ва хизматларини янада тезкор қилиш имкониятлари муҳокама қилинди.

Бундан ташқари, ёшларга замонавий IT билимларни бериш, уларни халқаро бозорда рақобатбардош бўлишлари учун зарур кўникмалар билан таъминлаш бўйича Яндекснинг таълим лойиҳалари ўрганилди. Хусусан, дастурлаш, сунъий интеллект ва дата-аналитика йўналишида қўшма лойиҳалар ташкил этиш таклифлари кўриб чиқилди.

Мазкур учрашувда кўтарилган барча масалалар Вазирлик ва Yandex компанияси ўртасидаги ўзаро манфаатли ҳамкорликни янада ривожлантириш учун муҳим қадам бўлиши таъкидланди.