Ўзбекистон ва Хитой ижтимоий-иқтисодий ривожлантириш соҳасидаги ҳамкорликни кенгайтириш масалаларини муҳокама қилди

Тошкент, Ўзбекистон (UzDaily.uz) — 12 сентябрь куни ИССВ вакиллари Хитой Халқ Республикаси Савдо вазирлиги делегацияси билан учрашди.

Музокаралар чоғида томонлар икки тарафлама муносабатларни мустаҳкамлашнинг аҳамиятини таъкидлаб, савдо-иқтисодий ва инвестициявий алоқаларнинг барқарор ўсиши, шунингдек, техник ва беғараз ёрдам соҳасида ҳамкорликнинг кенгайиб бораётганини қайд этдилар.

Учрашувда ижтимоий-иқтисодий ривожланишнинг асосий йўналишларида ҳамкорликни янада чуқурлаштириш истиқболлари муҳокама қилинди. Барқарор ўсишни таъминлаш, инновацияларни жорий этиш, аҳолининг фаровонлигини ошириш ҳамда замонавий чақириқларга жавоб беришга қаратилган ташаббуслар кўриб чиқилди.

Томонлар икки давлатнинг манфаатларини инобатга олган ҳолда янги ҳамкорлик йўналишларини ишлаб чиқишга тайёр эканликларини билдирдилар.

Учрашув иштирокчилари юқори даражадаги мунтазам мулоқот қўшма лойиҳаларни кенгайтириш, тажриба алмашиш ва инвестицияларни жалб этиш учун замин яратаётганини таъкидладилар.

Эришилган келишувларни амалиётга жорий қилиш, алоқаларни қўллаб-қувватлаш ва ҳамкорликнинг янги шаклларини ривожлантиришга ниятлар борлиги билдирилди.

Музокаралар якунида томонлар ўзаро манфаатли муносабатларни янада мустаҳкамлаш, шунингдек, Ўзбекистон ва Хитой ўртасидаги стратегик шериклик ҳамда дўстликни ривожлантиришга тайёрлигини қайд этдилар.