Тошкент, Ўзбекистон (UzDaily.uz) — Ўзбекистон–Хитой иқтисодий алоқаларида янги саҳифа очилди. Инвестициялар, саноат ва савдо вазирининг биринчи ўринбосари Нозимжон Холмуродов бошчилигидаги «Ўзчармсаноат» уюшмаси делегацияси Хитой Халқаро Савдони Ривожлантириш Қўмитаси (CCPIT) Гуанчжоу бўлими вакиллари билан учрашди.

Музокаралар давомида томонлар Ўзбекистон чарм-пойабзал саноатининг жадал модернизацияси, ишлаб чиқариш имкониятлари ва экспорт салоҳияти юзасидан батафсил фикр алмашди. Хитой томони мамлакатимиздаги саноат зоналари имкониятлари билан таништирилди ҳамда мавжуд инфратузилма хорижий инвесторлар учун жозибадор омил сифатида қайд этилди.

Хитой компаниялари Ўзбекистонда чарм маҳсулотлари ишлаб чиқаришга ихтисослашган кичик саноат зоналарида қўшма лойиҳалар амалга оширишга қизиқиш билдирди. Учрашувда ишлаб чиқариш қувватларини кенгайтириш, янги технологияларни жорий қилиш ва экспортни оширишга хизмат қилувчи ташаббуслар алоҳида муҳокама қилинди.

Делегация аъзолари Ўзбекистон бозорига оид махсус тақдимот ўтказиб, мамлакатимизнинг ички ва ташқи бозорлардаги ўрни, логистика имкониятлари ҳамда халқаро ҳамкорлик истиқболлари ҳақида маълумот берди.

Хитой Халқаро Савдони Ривожлантириш Қўмитаси билан ўтказилган музокаралар икки томонлама иқтисодий ҳамкорликни янада кенгайтириш, қўшма лойиҳаларни амалга ошириш ва Ўзбекистон чарм саноатини янги босқичга олиб чиқишга хизмат қилиши кутилмоқда.