Тошкент, Ўзбекистон (UzDaily.uz) — 2025-йил 22-январь куни Куала-Лумпурда Ўзбекистон Республикаси Иқтисодиёт ва молия вазирлиги делегацияси Малайзия Иқтисодиёт вазирининг ўринбосари YB Датo' Ҳажжа Ханифа Ҳажар Таиб билан учрашув ўтказди.

Учрашувда Малайзиянинг барқарор иқтисодий ўсишни таъминлашдаги муваффақиятли тажрибаси, ресурсларни самарали бошқариш, қайта тикланувчи энергия манбаларини ривожлантириш, ҳудудий иқтисодиётни рағбатлантириш бўйича тажрибаси батафсил муҳокама қилинди.

Мулоқот давомида томонлар қуйидаги масалаларда ҳамкорлик қилиш имкониятларини муҳокама қилдилар:
 • "Яшил" иқтисодиёт – қайта тикланувчи энергия манбаларидан фойдаланишни кенгайтириш, иқлим ўзгаришига мослашиш стратегияларини ишлаб чиқиш ва углерод эмиссияларини қисқартириш бўйича қўшма лойиҳалар;
 • Технологик инновациялар – илмий тадқиқотларни амалий иқтисодиётга татбиқ қилиш, рақамли технологияларни ривожлантириш ва технологиялар трансферини қўллаб-қувватлаш;
 • Инсон капиталини ривожлантириш – меҳнат бозорининг ривожланишини инобатга олган ҳолда ёш мутахассисларни тайёрлаш борасида билим ва малака алмашиш учун семинар ва тренинглар ташкил қилиш

Учрашув якунида томонлар иқтисодий ҳамкорликни кенгайтириш мақсадида мунтазам мулоқотни давом эттириш ва икки томон учун ўзаро манфаатли бўлган йўналишларда имкониятлар мунтазам ўрганиб борилишига келишиб олдилар. Бу ҳамкорлик Ўзбекистоннинг 2030-йилга мўлжалланган "Яшил" иқтисодиёт стратегиясини амалга оширишда халқаро тажриба ва ресурслардан самарали фойдаланиш учун муҳим платформа бўлиб хизмат қилади.