Тошкент, Ўзбекистон (UzDaily.uz) — Ўзбекистон ва Иордания калий ва фосфор ўғитларини ишлаб чиқариш бўйича қўшма лойиҳаларни амалга оширишга келишиб олди. Бу ҳақда “Ўзкимёсаноат” АЖ бошқарув раиси Одил Темиров “O’zbekiston 24” телеканалига берган интервьюсида маълум қилди.

Унинг сўзларига кўра, келишувларга икки мамлакат вакиллари иштирокидаги музокаралар ва бизнес-форум доирасида эришилган. Темиров таъкидлашича, Ўзбекистонда калий ва фосфор хомашё конлари мавжуд бўлиб, бу қўшма ишлаб чиқаришларни йўлга қўйиш учун қулай шароит яратади.

«Биз иорданиялик компанияларга ушбу лойиҳаларни амалга оширишда саъй-ҳаракатларни бирлаштиришни таклиф этдик», — деди у.

“Ўзкимёсаноат” раҳбари шунингдек, Иорданияда фосфор ва калийни қайта ишлашга ихтисослашган йирик ишлаб чиқариш қувватлари мавжудлигини, улар асосан экспортга йўналтирилганини қайд этди. Шу билан бирга, мамлакат азотли ўғитларни Миср ва Саудия Арабистонидан импорт қилади, Ўзбекистон эса азотли маҳсулотларни ишлаб чиқаришда ривожланган саноатга эга.

Бундан ташқари, ўзбек томони ҳамкорларга поливинилхлорид ва кальцийнланган сода каби кимёвий маҳсулотлар экспорти ҳисобига ҳамкорликни кенгайтиришни таклиф қилди.