Тошкент, Ўзбекистон (UzDaily.uz) — 2025 йил 29 август куни Ўзбекистон Республикаси Инвестициялар, саноат ва савдо вазири ўринбосари Акрам Алиев “Alliance Strategic Advisors LLC” компанияси Президенти Курт Волкер ҳамда “Cintana Education”нинг Шарқий Европа ва Марказий Осиё бўйича Бош директори Чағри Бағчиоғлу билан учрашди.

Суҳбат чоғида томонлар Ўзбекистон–АҚШ муносабатларининг жорий ҳолати ва истиқболларини муҳокама қилиб, ҳамкорликнинг устувор йўналишлари сифатида: стратегик минераллар, кимё саноати, соғлиқни сақлаш, инфратузилма ва таълим соҳаларини белгилаб олдилар.

Алоҳида эътибор таълим соҳасига қаратилиб, хусусан 2024 йилда Тошкент шаҳрида Аризона штати университети ва “Cintana Education” ҳамкорлигида ташкил этилган Америка Технологиялар Университетининг ривожланиш масалалари муҳокама қилинди. Мазкур олийгоҳ етти бакалавриат ва уч магистратура дастури бўйича ўқитишни амалга ошириб, муҳандислик, IТ ва бошқа долзарб йўналишларда юқори малакали кадрлар тайёрламоқда.

Музокаралар якунида томонлар Ўзбекистон ва АҚШ ўртасидаги таълимий ҳамда иқтисодий ҳамкорликни кенгайтиришга қаратилган янги ташаббусларни ишлаб чиқиш ва мунтазам мулоқотни давом эттиришга келишиб олдилар.