Тошкент, Ўзбекистон (UzDaily.uz) — Ўзбекистон Ташқи ишлар вазири Бахтиёр Саидов Беларусь Республикасининг янги элчиси Александр Огородников билан учрашди.

Ташқи ишлар вазири дипломатни Фавқулодда ва Мухтор Элчи лавозимига тайинлангани билан табриклаб, икки давлат ўртасидаги ҳамкорликнинг янада мустаҳкамланишига ишонч билдирди.

«Мазкур учрашувда унинг ишонч ёрлиқларининг нусхаларини қабул қилар эканмиз, ҳамкорлигимизнинг устувор йўналишлари ва яқин келажакдаги режаларимизни муҳокама қилдик», — деди Саидов.

Шунингдек, вазир элчига янги дипломатик фаолиятида муваффақиятлар тилади.

Александр Огородников бунгача Беларусь саноат вазирининг биринчи ўринбосари лавозимида ишлаган. У 2018–2025 йилларда Тошкентда фаолият юритган Леонид Маринич ўрнини эгаллади.