Тошкент, Ўзбекистон (UzDaily.uz) — Жорий йил 27 август куни Ўзбекистон Савдо-саноат палатаси раиси ўринбосари Дилшод Расулов "Халқаро савдо палатаси" Ҳудудий маслаҳат гуруҳи раиси, БМТ Бош котибининг Кавказ ва Марказий Осиё бўйича махсус вакили Фади Асли билан учрашув ўтказди.

Мулоқот давомида Ўзбекистон Савдо-саноат палатасининг "Халқаро савдо палатаси"га аъзо бўлиши ва расмий рўйхатдан ўтиши, шунингдек, мазкур ташкилотнинг мамлакатимизда ваколатхонасини очиш масалалари атрофлича муҳокама қилинди.

Бу ташаббус, аввало, Ўзбекистон тадбиркорларининг халқаро бозорга чиқиши, бизнес алоқаларини кенгайтириши ҳамда инвестициявий ҳамкорликни мустаҳкамлаши учун муҳим қадам сифатида қайд этилди.

Фади Асли ўз нутқида Ўзбекистон томонининг ташаббусларини тўлиқ қўллаб-қувватлашини ва уларни амалга оширишда зарур институционал ва амалий кўмак кўрсатишга тайёрлигини таъкидлади.

Учрашув самимий ва ишончли руҳда ўтиб, томонлар белгиланган мақсадларга эришиш йўлида доимий мулоқот ва амалий ҳамкорликни изчил давом эттиришга келишиб олдилар.