Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев Россия билан қўшма кино ишлаб чиқариш тўғрисидаги халқаро келишувни ратификация қилувчи қарорни имзолади.

Ҳужжат икки давлат ўртасида қўшма фильмлар яратиш ва прокат қилиш соҳасида ҳамкорликни тартибга солади. Шунингдек, ўзбек-рус қўшма киноленталарига миллий фильмлар билан бир хил имтиёзлар ва преференциялар тақдим этиш кўзда тутилган.

Томонлар қўшма фильмларни кинофестиваллар ва танловларда ҳамкорликда илгари суришга келишиб олдилар. Келишувга кўра, кинокартиналар албатта рус ёки ўзбек тилига дубляж қилинади. Шунингдек, суратга олиш гуруҳларининг кириш-чиқиш жараёнлари ва ускуналарнинг ташилиши соддалаштирилиши белгиланган.

Ушбу келишув 2024 йил 27 май куни имзоланган. Унинг амалга оширилиши учун масъул этиб Ўзбекистон Республикаси Маданият вазирлиги тайинланган.