Тошкент, Ўзбекистон (UzDaily.uz) — Президент Шавкат Мирзиёев хусусий секторнинг таълим соҳасидаги иштироки улушини оширишга қаратилган фармонни имзолади.

Фармонга мувофиқ, 2030 йил 1 январгача хусусий мактабгача ва ўрта таълим муассасалари барча солиқлар ва тўловлардан (ижтимоий солиқдан ташқари) озод этилади.

Бундан ташқари, ушбу ташкилотларда ишловчи хорижий ўқитувчилар ва мутахассислар жисмоний шахслар даромад солиғи ва ижтимоий солиқ тўлашдан озод қилинади.

Шунингдек, хусусий таълим муассасалари 2030 йил 1 январгача Ўзбекистонда ишлаб чиқарилмайдиган товарларни олиб киришда божхона тўловларидан озод қилинади (божхона расмийлаштируви учун тўловлардан ташқари).

Хусусий мактабгача ва умумтаълим ташкилотлари замонавий ўқув жиҳозлари, лаборатория асбоблари, компьютер техникаси, дастурий таъминот, ўқув ҳамда илмий-методик адабиётлар ва воситаларни божхона тўловларисиз импорт қилиш ҳуқуқига эга бўлади.

2025 йил 1 январдан бошлаб хусусий таълим ташкилотлари ўзларида доимий асосда ишлайдиган хорижий мутахассислар учун "А-2" туридаги визаларни бериш имкониятига эга бўлади.

Давлат ва хусусий таълим муассасалари томонидан жалб қилинган хорижий мутахассислар учун ишлашга рухсатнома бериш бўйича йиғим миқдори базавий ҳисоблаш қийматининг 30 баробаридан 1 баробаригача пасайтирилади.