Тошкент, Ўзбекистон (UzDaily.uz) -- Ўзбекистон Республикаси Президенти Шавкат Мирзиёев Бирлашган Араб Амирликлари Президенти Шайх Муҳаммад бин Зоид Ол Наҳаённинг таклифига биноан Бирлашган Миллатлар Ташкилотининг Иқлим ўзгариши бўйича конференциясида иштирок этиш учун 30 ноябрь куни амалий ташриф билан Дубай шаҳрига жўнаб кетди.

Аввал хабар қилинганидек, ташриф доирасида давлатимиз раҳбари глобал иқлим саммитининг ялпи сессиясида нутқ сўзлаши, шунингдек, хорижий мамлакатларнинг давлат ва ҳукуматлари, халқаро ташкилотлар ва етакчи компаниялар раҳбарлари билан қатор учрашув ва музокаралар ўтказиши кўзда тутилган.