Тошкент, Ўзбекистон (UzDaily.uz) — Ўзбекистоннинг ёқилғи-энергетика соҳасидаги етакчи илмий-техник нашри – “Ўзбекистон Нефть ва Газ” журнали ривожланишнинг янги босқичига қадам қўйди. 2024 йилда нашр Geo Research & Development Company (GRDC) илмий-технологик маркази бошқарувига ўтди. Бу билан журнал узлуксизликни сақлаб қолди, илмий йўналишни кучайтириб, экспертлик доирасини янада кенгайтирди.

Сўнгги ойларда ребрендинг қилинган журналнинг учта сони нашр қилиниб, улардан иккитаси 2025 йилда чоп этилди. Журнал профессионал ва илмий ҳамжамият учун тан олинган нашр мақомини сақлаб қолган ҳолда, мазмуни, тақдим этилиши ва дизайни жиҳатидан янада замонавий талқинда чоп этила бошлади.

“Ўзбекистон Нефть ва Газ” журнали 1996 йилдан бери чиқиб, нефть-газ соҳасидаги илмий ишланмалар, тармоқ трендлари ва ишлаб чиқариш амалиётларини тизимли равишда ёритувчи ихтисослашган нашрлардан бири бўлиб қолмоқда. У Олий аттестация комиссияси томонидан тавсия этилган илмий нашрлар рўйхатига киритилган бўлиб, республика ва унинг ташқарисида 3 000 нусхада тарқатилади.

Бугунги кунда журнал қуйидаги мавзуларни ўз ичига олади:

• геология-қидирув, углеводородларни қайта ишлаш, экология, рақамлаштириш ва келажак энергетикаси бўйича экспертлик материаллари;

• етакчи мутахассислар ва соҳа раҳбарлари билан интервьюлар;

• ёш олимлар ва муҳандислар учун ўз тадқиқотлари натижаларини нашр этиш имконияти.

Таҳрир ҳайъати раиси, техника фанлари доктори Азизбек Назаров шундай таъкидлайди:

“Бугун соҳада илмий мулоқотни кучайтириш ҳар қачонгидан ҳам муҳим. “Ўзбекистон Нефть ва Газ” журнали профессионал ҳамжамият учун эътибор марказига, билимлар амалий қийматга эга бўладиган, инновациялар эса қўллаб-қувватланадиган ва ривожланишга эришадиган платформага айланмоқда”.

Журналнинг таҳрир кенгаши таркибига йирик нефть-газ компаниялари раҳбарлари, олимлар ва халқаро экспертлар киради. Нашр ҳар чоракда, йилига тўрт марта чоп этилади. Журналнинг навбатдаги сонларида ўқувчиларни соҳани барқарор ривожлантириш бўйича таҳлиллар, конларни ўзлаштиришнинг янги технологиялари ҳақидаги материаллар, глобал тамойиллар шарҳи ва энергия самарадорлиги соҳасидаги тадқиқотлар кутмоқда.