Тошкент, Ўзбекистон (UzDaily.uz) — Ўзбекистон Марказий банкида UnionPay халқаро тўлов тизими вице-президенти Лю Ҳэнг бошчилигидаги делегация билан учрашув бўлиб ўтди. Томонлар UnionPay’нинг мамлакатдаги ҳозирги фаолияти, эришилган натижалар ва келгусидаги режаларни муҳокама қилдилар.

UnionPay делегацияси мамлакатдаги фаолиятини кенгайтириш, жумладан, онлайн тўлов тизимларини ривожлантириш, QR кодлардан фойдаланишни кенгайтириш ва маҳаллий банклар билан интеграцияни чуқурлаштириш каби инновацион хизматларни жорий этиш бўйича режалари билан таништирди.

Ўзбекистон ва Хитой ўртасидаги иқтисодий алоқаларнинг ривожланаётгани ва ҳар икки мамлакатнинг туристик салоҳиятини инобатга олган ҳолда, томонлар истеъмолчилар учун қулай шарт-шароит яратиш мақсадида миллий тўлов тизимлари билан ҳамкорликни кенгайтириш имкониятларини муҳокама қилдилар.

Мазкур учрашув Ўзбекистоннинг тўлов инфратузилмасини модернизация қилиш ҳамда молиявий хизматлардан фойдаланиш имкониятларини яхшилашга бўлган интилишини кўрсатади.