Тошкент, Ўзбекистон (UzDaily.uz) — 2025 йил 24 апрель куни Ўзбекистон Республикаси Марказий банки асосий фоиз ставкасини ўзгаришсиз — йиллик 14,0% даражасида сақлаб қолиш тўғрисида қарор қабул қилди. Бу қарор инфляцион жараёнлардаги ноаниқлик сақланаётгани ва қатъий пул-кредит шароитларини қўллаб-қувватлаш зарурати билан изоҳланди.

Марказий банк маълумотига кўра, йил бошидан буён инфляция ўсишга мойил бўлган: март ойида умумий инфляция даражаси 10,3%, асосий (базовая) инфляция — 8,1% ни ташкил этди. Шунга қарамасдан, аҳоли ва бизнес инфляцион кутилмалари пасайган бўлса-да, ҳозирги кўрсаткичлардан ҳали ҳам юқори бўлиб қолмоқда.

Ҳозирги кунда ички бозорда талаб ва таклиф ўртасидаги дисбаланс, шунингдек, ташқи омиллар инфляцион босимни кучайтирмоқда. Бунда 2024 йилда амалга оширилган энергоноситалар нархларини либераллаштириш таъсири 2025 йилнинг иккинчи чораги охиригача тугаши ва бу омил нархларнинг ошиш суръатини секинлаштириши кутилмоқда.

Шу билан бирга, жаҳон иқтисодиётидаги беқарорлик, нархлар ва харажатларнинг ўсиши инфляцияга босимни сақлаб турмоқда.

Марказий банк тахминига кўра, 2025 йил охиригача инфляция даражаси 7–8% прогноз коридорининг юқори чегарасига яқинлашиши мумкин.

Иқтисодий ўсиш жорий йилнинг биринчи чорагида 6,8% ни ташкил этди. Йил якунида эса, истеъмол, инвестициялар ва чет элдан келаётган пул ўтказмалари ҳисобига, ЯИМ ўсиши 6% атрофида бўлиши кутилмоқда.

Марказий банк ўрта муддатли истиқболда инфляцияни 5% даражасига тушириш мақсадида ҳозирги қатъий пул-кредит сиёсатини сақлаб туришини маълум қилди.

Келгуси йиғилиш 2025 йил 12 июнга белгиланган.