Тошкент, Ўзбекистон (UzDaily.uz) — Тошкент шаҳар ҳокимлиги матбуот хизмати ижтимоий тармоқларда тарқалган «Ўрикзор» савдо мажмуаси ёпилади ёки реконструкция қилинади деган хабарларни рад этди.

Пойтахт маъмурияти таъкидлашича, бозор ҳудудида ҳеч қандай қурилиш ёки реконструкция ишлари олиб борилмаяпти. Барча савдо ва бошқа объектлар ўз фаолиятини тасдиқланган режа асосида, кундалик ва дам олиш кунларисиз, одатдаги тартибда давом эттирмоқда.

«Комплексни тугатиш, бузиш ёки реконструкция қилиш тўғрисидаги маълумотлар ҳақиқатга тўғри келмайди», — дейилади шаҳар ҳокимлиги матбуот хизматининг расмий баёнотида.

Аввалроқ ижтимоий тармоқларда «Ўрикзор» ёпилади деган иддаолар акс этган видеолар тарқалган эди. Уларда айрим шахслар ижарачиларга олдиндан савдо учун бошқа жой излашни тавсия қилган.

Кейинчалик интернетда турли норасмий манбалар томонидан бу хабарлар рад этилган видеолар пайдо бўлди. Энди эса шаҳар ҳокимиятининг расмий баёноти орқали вазиятга ойдинлик киритилди.