Тошкент, Ўзбекистон (UzDaily.uz) — Мопед, скутер ва электроскутерлар 2025 йилнинг 1 мартигача давлат рўйхатидан ўтишлари ва давлат рақам белгиларини олишлари шарт. Бу ҳақда Ўзбекистон ИИВ Йўл ҳаракати хавфсизлиги хизмати хабар берди.

Эслатиб ўтамиз, 2024 йил июль ойида Ўзбекистонда ҳукумат қарорига мувофиқ мопед ва скутерлар учун мажбурий давлат рўйхатидан ўтиш талаблари жорий этилган эди.

Давлат рақам белгиларини бериш жараёни 26 декабрь куни рўйхатга олиш ва имтиҳон бўлимларида бошланди.

Йўл ҳаракати хавфсизлиги хизмати барча мопед, скутер ва электроскутерлар кўрсатилган муддатгача рўйхатдан ўтиши кераклигини таъкидламоқда. Ушбу транспорт воситаларини бошқарувчи шахслар А тоифали ҳайдовчилик гувоҳномасига эга бўлишлари лозим.

Вазирлик маълумотига кўра, 2025 йилнинг 1 мартидан кейин йўл ҳаракати инспекторлари қонунчиликка мувофиқ чора-тадбирлар кўрадилар, жумладан, транспорт воситаларини вақтинча жарима майдончаларига жойлаштиришни амалга оширадилар.