Тошкент, Ўзбекистон (UzDaily.uz) — Фармацевтика тармоғини ривожлантириш агентлиги директори Абдулла Азизов "Qurecraft" халқаро шартномавий тадқиқот ташкилоти билан ишчи учрашув ўтказди.

Томонлар Ўзбекистонда клиник тадқиқотларни ривожлантириш учун давлат-хусусий шериклик (ДХШ) доирасидаги ҳамкорлик имкониятларини муҳокама қилдилар. Хусусан, рақамли инфратузилмани яратиш, тиббиёт муассасаларини халқаро аккредитациядан ўтказиш, мутахассислар тайёрлаш, шунингдек, хорижий фармацевтика компанияларини мамлакатга жалб қилиш масалалари кўриб чиқилди.

"Qurecraft" компанияси дастурий таъминотни ишлаб чиқиш, кадрлар тайёрлаш ва меъёрий-ҳуқуқий қўллаб-қувватлашга сармоя киритишга тайёрлигини билдирди. Тадқиқотларни бошқаришнинг шаффоф тизимини шакллантириш, беморларнинг ягона реестрини юритиш масалаларига алоҳида эътибор қаратилди.

Томонлар ДХШ концепциясини янада такомиллаштириш ва тегишли бизнес-кейсни тайёрлашга келишиб олдилар.