Тошкент, Ўзбекистон (UzDaily.uz) — Европа тикланиш ва тараққиёт банки (ЙТТБ) томонидан мамлакатнинг иккинчи йирик молия институти  SQBга ажратилган 25 миллион АҚШ доллари (21,9 миллион евро) миқдоридаги кредит эвазига Ўзбекистондаги ёш тадбиркорлар раҳбарлик қилаётган ёки уларга тегишли бўлган микро, кичик ва ўрта корхоналар (МКЎК) ўсиш учун кўпроқ имкониятларга эга бўлади.

Ушбу кредит ЙТТБнинг Марказий Осиёдаги “Бизнесда ёшлар” дастури доирасида 35 ёшгача бўлган жисмоний шахслар раҳбарлигидаги ёки уларга тегишли бўлган кичик ва ўрта корхоналарни кредитлаш учун ажратилмоқда.

 SQB ушбу маблағларни ёш тадбиркорларни қўллаб-қувватлашга йўналтиргани ҳолда ўзининг молиявий маҳсулотлари кўламини кенгайтиради. Ёш тадбиркорлар Марказий Осиё аҳолисининг  27 фоизини ташкил қилади ва улар аҳолиси энг гавжум бўлган Ўзбекистон учун алоҳида аҳамиятга эгадир.

Дастур доирасида кредит олган тадбиркорлар ЙТТБнинг Кичик бизнес учун маслаҳат-Адвисе фор Смалл Бусинессес дастури орқали таклиф қилинадиган тренинглар, маслаҳат хизматлари ва тармоқ имкониятларидан ҳам баҳраманд бўлишади.

Яқинда Европа тикланиш ва тараққиёт банки томонидан Марказий Осиёда ўтказилган бозор тадқиқоти шуни кўрсатдики, минтақадаги кўплаб ёшлар кучли тадбиркорлик тафаккурига эга бўлсада, уларнинг жуда кам қисми катта ёшдаги одамлар каби иқтисодий имкониятларга эга. Дарҳақиқат, уларнинг атиги 10 фоизигина зарур тайёргарлик ва касбий тажрибага эга.

ЙТТБ бугунги кунга қадар Ўзбекистонда 174 та лойиҳага қарийб 5,6 миллиард евро сармоя киритган бўлиб, маблағларнинг асосий қисми хусусий тадбиркорликни қўллаб-қувватлашга йўналтирилган. Мамлакат сўнгги беш йилдан бери Марказий Осиёда ЙТТБ сармояларининг етакчи олувчиси бўлиб келмоқда.