Дзюдо: Тошкент халқаро турнирга мезбонлик қилади

Тошкент, Ўзбекистон (UzDaily.uz) -- Шу йилнинг 1-2 февраль кунлари пойтахтимиздаги МҲСК спорт мажмуасида дзюдо бўйича Ўзбекистонда хизмат кўрсатган мураббий Николай Қўлдошев хотирасига бағишланган халқаро турнир бўлиб ўтади. Бу ҳақда Миллий Олимпия қўмитаси матбуот хизмати маълум қилмоқда.

10-маротаба ташкил этилаётган ушбу мусобақада юртимиз полвонларидан ташқари қўшни Қозоғистон, Қирғизистон ва Тожикистондан ташриф буюрган спортчилар ҳам татамига чиқишади.

Мазкур халқаро турнир 1999-2000 йилларда туғилган ёш полвонлар ўртасида 16та вазн тоифасида ташкил этилади.

Баҳслар қуйидаги вазн тоифаларида ўтказилади:

Ўғил болалар: -55, -60, -66, -73, -81, -90, -100, +100 кг

Қизлар: -44, -48, -52, -57, -63, -70, -78, +78 кг

Режага мувофиқ 1 февраль куни иштирокчиларни тарозидан ўтказиш ҳамда мусобақага қуръа ташлаш маросими ўтказилса, 2 февралда юқорида кўрсатилган вазн тоифалари бўйича баҳслар бўлиб ўтади. Мусобақа соат 10:00да бошланади. Финал беллашувлари эса соат 17:00га белгиланган.