Тошкент, Ўзбекистон (UzDaily.uz) — Бугун, 10 февраль куни Бухоро вилоятида диаметри 1020 мм бўлган магистрал газ қувурида газ сизиб чиқиши кузатилди, натижада ёнғин содир бўлди.

Энергетика вазирлиги матбуот хизматининг маълумотига кўра, ҳозирда ҳодиса оқибатларини бартараф этиш учун зарур чоралар кўрилмоқда.

Вилоят фавқулодда ҳолатлар бошқармасининг маълум қилишича, авария соат 11:26 да «Бухоро – Урал» газ қувурининг 106-чақириғи, «Газли» магистрал газ қувурлари бошқармасига қарашли ҳудудда, Ромитан тумани марказидан тахминан 40 км узоқликда содир бўлган. Соат 11:30 да тезкор равишда газ қувурининг вентиллари ёпилган, шундан сўнг қувурда қолган газ чиқиб кетган. Ҳозирги пайтда авария тўлиқ бартараф этилган.

Дастлабки маълумотларга кўра, ҳодиса натижасида жабрланганлар йўқ. Ҳодиса жойида вилоят Фавқулодда ҳолатлар бошқармаси ходимлари, туман бўлими бошлиғи ва ёнғин-қутқарув экипажи иш олиб бормоқда.