Тошкент, Ўзбекистон (UzDaily.uz) — 12-14 август кунлари Ташқи ишлар вазири Бахтиёр Саидов бошчилигидаги мамлакатимиз делегацияси Кувайт шаҳрида бўлди.

Ташриф давомида Ўзбекистон-Кувайт бизнес форуми ҳамда юртимизда ишлаб чиқарилган маҳсулотлар кўргазмаси ташкил этилди.

Унда икки мамлакатнинг тегишли вазирлик ва идоралари, саноат бирлашмалари, тижорат банклари ҳамда 200 дан ортиқ йирик кувейт ва ўзбек компаниялари вакиллари қатнашди.

Тадбирда Ўзбекистон Савдо-саноат палатаси раиси ўринбосари Дилшод Расулов иштирок этиб, ўз нутқида мамлакатимизда амалга оширилаётган ислоҳотлар, тадбиркорлик фаолияти учун яратилган қулай шароитлар,

Ўзбекистоннинг инвестициявий ва экспорт салоҳияти ҳақида атрофлича маълумот берди.

Мазкур форум доирасида ташкил этилган кўргазмасида мамлакатимизда ишлаб чиқарилган маҳсулотларга катта қизиқиш билдирилди.

Бундан ташқари, делегация вакиллари ташриф давомида қатор компания раҳбарлари билан музокаралар ўтказиб, Кувайтлик ҳамкорлар билан қатор йўналишларда ўзаро манфаатли лойиҳаларни ҳаётга татбиқ, савдо ҳажмини ошириш, инвестициялар кўламини кенгайтиришга келишиб олди.