Тошкент, Ўзбекистон (UzDaily.uz) — Инвестициялар, саноат ва савдо вазири Лазиз Қудратов БААнинг Burjeel Holdings компанияси бош директори Сафиҳр Аҳмад билан учрашди.

Учрашув давомида компания раҳбариятига Ўзбекистоннинг қулай инвестиция муҳити ҳақида маълумот берилди. Хусусан, солиқ имтиёзлари, преференциялар, инвестор манфаатларини ҳимоя қилишга қаратилган қонунчилик кафолатлари, шунингдек, ички ва минтақавий бозорларнинг жозибадор имкониятлари тақдим этилди.

Томонлар ўзаро ҳамкорликни янада кенгайтириш истиқболларини муҳокама қилдилар.

2007 йилда ташкил этилган Burjeel Holdings компанияси Яқин Шарқ ва Шимолий Африкадаги энг йирик хусусий тиббиёт операторларидан бири ҳисобланади. Компаниянинг бош қароргоҳи Дубайда жойлашган бўлиб, у 17 мингдан ортиқ ходимга эга ва умумий активлари 2,5 миллиард долларга баҳоланади.