АҚШ Ўзбекистондан импорт қилинадиган товарларга 10% бож жорий этди
Тошкент, Ўзбекистон (UzDaily.uz) — АҚШ ҳукумати Ўзбекистондан импорт қилинадиган товарларга бож жорий этди.
2025 йил 2 апрелда АҚШ президенти Дональд Трамп 150 дан ортиқ давлат, жумладан, Ўзбекистондан келаётган маҳсулотларга янги тарифлар жорий этилганини эълон қилди.
Белгиланган қоидаларга кўра, кўпчилик давлатлар учун божхона ставкаси 10% этиб белгиланди. Шу билан бирга, айрим давлатлар учун бу миқдор анча юқори: Хитой ва Тайвань учун 32%, Европа Иттифоқи учун 20%, Ҳиндистон учун эса 26% ташкил қилади. Бундан ташқари, барча автомобиллар импорти учун ягона 25%лик тариф жорий этилди.
Ўзбекистон маҳсулотлари учун эса 10%лик бож ставкаси белгиланди.
Дональд Трамп ўз чиқишида бу қарорни "Иқтисодий мустақиллик декларацияси" деб атади ва 2 апрелни "Озодлик куни" деб эълон қилди. Унинг сўзларига кўра, бу чоралар адолатсиз савдо амалиётларини тугатиш ва АҚШдаги иш ўринларини ҳимоя қилишга қаратилган.
Вашингтоннинг қарори халқаро ҳамжамиятда кескин реакцияга сабаб бўлди. Европа Комиссияси раиси Урсула фон дер Ляйен янги божларни танқид қилиб, уларни глобал иқтисодиёт учун жиддий таҳдид деб баҳолади. Шунингдек, Европа Иттифоқи бу чораларга жавоб қайтаришга тайёрланаётганини маълум қилди.
Иқтисодчиларнинг таъкидлашича, тарифларнинг оширилиши АҚШ истеъмолчилари учун нархларнинг ўсишига ва нафақат Америка, балки бошқа давлатлар иқтисодиётининг секинлашишига олиб келиши мумкин. Биржа бозорлари эса Трампнинг эълонига кескин пасайиш билан жавоб берди.
Ўзбекистон учун 10%лик бож жорий этилиши АҚШга экспортга салбий таъсир кўрсатиши мумкин, айниқса, текстиль саноати ва қишлоқ хўжалиги каби тармоқларга. Америка бозорига йўналтирилган компаниялар янги шароитларга мослашиш ёки савдо йўналишларини ўзгартиришга мажбур бўлади.
2024 йил якунларига кўра, Ўзбекистон ва АҚШ ўртасидаги товар айирбошлаш ҳажми $881,7 млн га етди, 2023 йилда эса бу кўрсаткич $765,1 млн ни ташкил қилган эди. 2024 йилда Ўзбекистоннинг АҚШга экспорти $317,4 млн гача ўсди (2023 йилда $253,1 млн бўлган), АҚШдан импорт эса $564,3 млн га етди (2023 йилда $512 млн эди).